எழுத்தழகு, இலங்கையின் எழுத்து வடிவங்களின் தோற்றங்களையும், வரலாற்றையும், அவற்றின் எதிர்காலத்தையும் கண்டறிந்து வியக்கும் ஒரு கண்காட்சியாகும். கொழும்பைத் தளமாகக் கொண்டு இயங்கும் மூநியக் எழுத்துருக் கலையகம் நெறிப்படுத்தும் இந்த ‘ஊடாடல் கண்காட்சி’ (Interactive Exhibition), இலங்கையின் தமிழ், சிங்கள, லத்தீன்/ஆங்கில எழுத்துருக்களின் பரிணாம வளர்ச்சியைக் காட்சிப்படுத்துகின்றது.

மற்றவர்களுடன் தொடர்பாடுதலும், பிறரால்  புரிந்து கொள்ளப்படுதலுமே மனித வாழ்வின் மையப்புள்ளியாக விளங்குகிறது. இன்றைய நவீன வாழ்வில், நாம் எவ்வாறு உழைக்கிறோம், வாழ்கிறோம், மற்றும் தகவல்களைப் பகிர்ந்து கொள்கிறோம் என்பதற்கெல்லாம் டிஜிட்டல் உள்கட்டமைப்புகளே (digital infrastructure) அடித்தளமாக அமைந்துள்ளன. உலகளாவிய டிஜிட்டல் தளங்களைக் கலாசாரப் பரிமாற்றங்கள் மற்றும் உரையாடல்களுக்கான களங்களாகவே 'எழுத்தழகு' உற்றுநோக்குகிறது. அத்தளங்களில், ஒரு மொழியின் வாசிப்புத்திறன் (legibility) குறித்து எடுக்கப்படும் முடிவுகள்தான் யார் சமூகத்தில் அடையாளப்படுத்தப் படுகிறார்கள், யாருடைய குரல் கேட்கப்படுகிறது மற்றும் யாருடைய மொழி நிலைத்து வாழ்கிறது என்பதில் மிக ஆழமான தாக்கங்களை ஏற்படுத்துகின்றன.

எழுத்துருக் கலை, வடிவமைப்பு, கலாச்சாரம், அடையாளம் என்னும் பரிமாணங்களில் ஒரு தசாப்த காலமாகப் பயணிக்கும் மூநியக், தனது கன்னிக் கண்காட்சியான ‘எழுத்தழகு’ மூலம் தமது எழுத்துரு, ஆவண மற்றும் மென்பொருள் கட்டுமானப் பயணங்களில் தன் நேயர்களையும் பங்கு கொள்ள அழைக்கிறது.